CEBU, Philippines - Nagkadaghan ang mga pet lovers nga supak sa balaudnong gipalabang sa duha ka kongresista sa Sugbu pagtugot sa usa ka kompanyang makatukod og greyhound racetrack sa dakbayan sa Mandaue.
Usa na niini mao ang City Veterinarian sa siyudad sa Sugbu nga si Doctor Alice Utlang tungod kay gihulagway niya kining “animal cruelty” tungod kay giingong patyon ang iro nga mapildi sa lumba gawas nga kini usa usab ka matang sa sugal.
Gani miingon si Utlang nga ang greyhound racing gi-ban na sa ubang kanasuran ilabi na sa Australia.
Sila si Rep. Nerissa Soon-Ruiz ug Rep. Benhur Salimbangon gikatahong maoy mipalabang sa House Bill 5291 nga magtugot sa Fox Millennium Amusement Club pagtukod og greyhound racetrack sa dakbayan sa Mandaue.
Matud pa ni Utlang nga makauwaw ang gihimo sa nahisgutang mga kongresista tungod kay sama ra nga i-promote niini sa Sugbu ang sugal.
“Supak gyud ko ana kay makauuwaw kaayo, dakong sagpa ba, nganong i-promote man nato na dinhi sa Sugbu nga sugal man na,” sumala ni Utlang.
Nasayran nga ang nagkadaiyang animal rights groups nihimo og mga signature campaign nga nagsupak pagpalabang sa nahisgutang balaudnon.
Kini sama sa Animal Kingdom Foundation, Feather Friends Foundation, Compassion and Responsibility for Animals, Philippine Animal Welfare Society ug uban pa.
Lakip nga giingong nipadayag og pagsuporta sa mga animal rights groups mao mismo ang Arsobispo sa Sugbu nga si Ricardo Cardinal Vidal.
Kahinumduman nga sila si Ruiz ug Salimbangon pabor usab sa kontrobersyal nga Reproductive Health Bill nga kusganon gihapong gisupak sa Cardinal.
Apan si Mandaue City Mayor Jonas Cortes pabor sa maong proyekto tungod kay dayuhon unya kini sa mga turista ug makadugang sa kinitaan sa dakbayan.
Matud pa ni Cortes lahi sa kabayo nga sakyan ug bunalan, ang iro nga ilumba di makasinati og susamang pagmaltrato ug gani palanggaon pa gyud kini og maayo. Gipasabot ni Cortes nga kulang lang og kasayuran ug impormasyon ang mga tawong dali kaayong mikisi-kisi pagsupak sa maong plano. - Elly Bolonos uban sa report ni Bong Soriano (BANAT NEWS)