CEBU, Philippines - Naglaraw si Mayor Patrick Barcenas sa lungsod sa Carcar nga hangyoon ang mga kadagkuan sa Department of Education (DepEd) nga ipaubos sa re-orientation ang tanang magtutudlo sa publikong tunghaang elementarya ug high school sa ilang lungsod aron paglikay nga masubli ang sama sa pagkamatay sa usa ka estudyante kay gipusposan og kahoy sa kauban niini niadtong Martes sa buntag.
Si Barcenas nga gikahinabi sa Banat News nagkanayon nga gikinahanglan nga mapahinumdoman og balik ang mga magtutudlo sa paghilot dayon kun adunay motumaw nga panagbingkil sa mga tinun-an diha sa classroom aron dili modaku nga moresulta na unya sa dakong away.
Hinuon gipadayag ni Barcenas nga wala siya'y nakitang tulubagon sa magtutudlo ug sa prinsipal sa Can-Asujan National High School sa maong panghitabo kay naatol man nga recess ang maong insidente ug kombinsido usab siya sa resulta sa imbestigasyon nga gihimo sa kapolisan.
Nasayran nga walay personal nga panagdumot ang biktima ug ang 15 anyos nga suspek kay ang ilang away nagsugod ra man nianang buntaga dihang gipaninglan sa biktima og P10 nga amot ang suspetsado .
Apan ang nasuk-an sa suspetsado mao ra gyud ang matud pa bahad sa biktima kaniya nga kulatahon siya kay wala siya makahatag sa amotan nila.
Matud pa sa mayor nga gikahinabi niya ang suspek ug giangkon niini nga wala gyud siya'y intensiyon nga patyon ang iyang classmate niadtong higayona.
Nunot niini gipadayag sa mayor nga usa lang ka isolated case ang maong kaso ug dili maka-apektar sa kahusay ug kalinaw sa ilang lugar.
Kagahapon gikasuhan na ang maong batan-on diha sa piskalya ug ang maong buhatan na maoy pabut-on sa kapolisan kun isang-at ngadto sa korte ang maong kaso. – BANAT NEWS