CEBU, Philippines – Napasaylo na ni Cebu Archbishop Ricardo Cardinal Vidal ang mga suspetsadong mitulis ug mipatay kang Fr. Jovencio "Botoy" Rabusa apan gikinahanglang ilang atubangon ang silot sa ilang gibuhat.
Si Cardinal Vidal maoy personal nga mi-officiate sa funeral mass ni Fr. Rabusa sa St. James the Apostles Parish Church sa lungsod sa Badian lalawigan sa Sugbu sa milabay'ng hapon.
Matud pa ni Vidal dako ang iyang pasalamat sa kapolisan dihang maoy misugat kaniya gikan sa iyang pag-abot sa Sugbu sa milabay'ng adlaw nga nasikop na ang mga responsable sa kamatayon ni Fr. Rabusa.
Si Cardinal Vidal mipadayag nga iya nang napasaylo ang upat ka mga suspetsado apan kinahanglan nga mahatagan usab og hustisya si Fr. Rabusa sa balaud sa tawo.
Atol sa misa gipadayag ni Cardinal Vidal nga ang kamatayon ni Fr. Rabusa mugna sa mga tawo nga nasaag sa dalang matarong ug mga batan-on nga nalulong sa illegal nga drugas nga walay pagtahod sa katungod sa uban.
Apan imbes adto ihan-ok sa kapolisan ang basol, si Cardinal namahayag nga usa sa mabasol mao ang mga alagad mismo sa Diyos nga nagkuwang sa ilang katungdanan pagsangyaw ug pag-edukar sa tanang katawhan sa mga butang nga gidili sa Diyos.
Napasakaan na og kasong robbery with homicide sila si Roselo Rabanes, Gerald Tradio, Jonas Turawan ug ang 15-anyos.
Ang mitambong sa misa requiem ug mihatud sa lubong gibanabana ni Insp. Raymond Rodriguez ang hepe sa kapolisan sa lungsod sa Badian nga moabot ngadto sa 5 mil ka mga tawo.
Si Fr. Jovencio Rabusa, 20 ka tuig na nga nagserbisyo sa iyang pagkapari ug mialagad sa Bantayan Island, barangay Guadalupe sa dakbayan sa Sugbu, sa Buanoy lungsod sa Balamban ug sa Santander ug ang katapusang dapit diin siya nadestino mao ang lungsod sa Naga. – Bong Soriano (BANAT NEWS)