CEBU, Philippines – Nakasaway ang labing unang Sangguniang Kabataan Federation (SKF) president sa siyudad sa Sugbu sa dili maayong dungog sa pipila ka SK chairperson sa kabarangayan sa dakbayan.
Kini human masayod si Charles Vailoces nga dunay mga SK chairperson karon sa pipila ka barangay sa siyudad nga nangamabdos tungod sa pre-marital sex sanglit wala man silay mga bana.
Nasayran sa Banat News nga labing minos duha ka SK chairperson sa dakbayan ang gipamabdosan ug pulos na usab nakapanganak.
Usa niini nga gikatahong bag-o lang nakapabunyag sa iyang anak, ang giingong gipaangkan sa usa ka minyo gikan sa silingang barangay.
Alang kang Vailoces, dili kini angayang himuon sa usa ka SK chairperson nga giila nga maoy lider sa kabatan-unan diha sa ilang barangay.
Apan taliwa sa pagsaway ni Vailoces, kini nakadayeg lang gihapon ngadto sa hingtungdang mga SK official tungod sa pag-atubang niini sa ilang problema.
“Ang ako lang gisaluduhan ana nila though nasayop sila, nga wa nila ipakuha ang bata kay that’s against the church, that’s against our religion,” sumala ni Vailoces.
Gitataw sa labing unang SKF president sa siyudad nga sa iyang panahon niadtong dekada 90, walay SK chairperson sa dakbayan nga namabdos.
Dili hinoon makasiguro si Vailoces nga ang iyang mga sakop kaniadto pulos mga ligdong ug wala mosuway sa pre-marital sex sanglit usa sa mga SK chairperson atol sa iyang termino, ang gikatahong nakigtagay sa kalipay sa uyab niini sulod mismo sa City Hall.
Taliwa niini gipadayag ni Vailoces nga maayo ang tumong sa kapunungan sa mga batan-on ug siya dili pabor nga bungkagon ang SK.
Ang buhatan sa SKF sa City Hall nasayod na sa nanganak nga mga SK chairperson apan wala mohimo og imbestigasyon tungod kay sila giingong wala makadawat og reklamo.
Gikatahong regular usab nga nitambong sa ilang mga tigom ang angkan nga mga SK chairperson ug aktibo gihapon sa ilang mga gimbuhaton. – Elly Bolonos (BANAT NEWS)