CEBU, Philippines - Ang huwes nga nagkupot sa kasong parricide batok ni PBMA supreme leader Ruben Ecleo Jr. buot nga maniguro sa seguridad sa akusado pinaagi sa pagpatawag sa mga abogado sa prosecution ug depensa lakip na ang kapolisan.
Si RTC-7 Branch 10 Judge Soliver Peras mibutyag sa iyang kamanduan nga iyang pakigtagboan ang mga abogado sa prosecution, depensa ug kapolisan karon nang petsa 21 ning bulan sa Hulyo mga alas 2:00 sa hapon.
Matud pa ni Peras nga gusto siyang mahimong hapsay ang pagsugod pagbalik sa hearing sa kaso batok ni Ecleo.
Samtang si Atty. Fritz Quiñanola usa sa mga volunteer private prosecutor nagkanayon nga atol unya sa maong tigum iya usab nga isugyot nga tugutan nga makapadayon sa pag-cover ang mga sakop sa media sa hearing sa maong kaso.
Gitataw hinuon ni Atty. Quiñanola nga ilang sigurohon nga dili makabalda sa hearing ang mga sakop sa media ilabina sa mga interviews nga pagahimuon sa dili pa o human na sa hearing sa korte.
Si Atty. Quiñanola misaad nga ilang unahan sa paghangyo ang korte sa pagtagad og una sa dugay na kaayong pending motion nga nagtinguha sa pagbakwi sa korte sa usa ka milyon ka pesos nga piyansa ni Ecleo tungod kay himsog na man kini ug dili na “walking time bomb” nga maoy ilang pangangkon kaniadto.
Si Ecleo gikasuhan og parricide may labot sa kamatayon sa iyang asawang si Alona Bacolod Ecleo. - BANAT NEWS