CEBU, Philippines – Naglabad ang ulo sa mga opisyal sa kagamhanan sa dakbayan sa Talisay gumikan sa pagkakuwang og mga kahimanan sama sa pansayan sa mga eskuylahan sa maong dakbayan.
Si Konsehal Dennis Basillote tsirman sa edukasyon sa konseho sa dakbayan mibutyag sa Banat News kagahapon nga siya mismo maoy nakasaksi sa pagkakuwang og mga black board, classroom, lingkoranan ug pansayan sa mga tulunghaan sa siyudad. Nagpanlingo si Basillote kay may kuwartang gisuporta ang kagamhanan sa dakbayan alang ning sulirana apan kuwang kaayo kay daghan kaayo ang eskuylahan sa maong dakbayan.
Ang Talisay may mokapin sa 20 ka tulunghaang elementarya ug 20 ka high school. Unya may 150 ka mga Teacher Aid Volunteer (TAV) nga gikatagkatag sa nagkalainlaing tulunghaan nga kuwang usab kaayo busa nagtibi intawon si Basillote sa hilabihang kaguol niini. – Brenda D. Batuto (BANAT NEWS)