CEBU, Philippines – Gitulis ug gikulata sa tulo ka mga lalaking sakay og motorsiklo ang cashier ug drayber sa usa ka softdrink company samtang naghatod sa ilang mga produkto sa mga tindahan sa sitio Buyo barangay Binongkalan lungsod sa Catmon niadtong Biyernes sa alas 2:00 sa hapon.
Ang mga biktima mao si Joynez Seno, 19, cashier ug ang drayber nga si Esterlito Bojos, 40 , pulos kawani sa Pepsi Cola company ug pulos mga molupyo sa barangay La Paz sa siyudad sa Bogo.
Matud pa ni PO2 Bernard Ares sa Catmon Police dihang nahinabi sa Banat News naghatud og softdrinks ang duha sa usa ka Molijon Sari-Sari Store ug human nila madiskarga ug madawat ang bayad gikatahong kalit lang silang gihunongan sa tulo ka lalaking nag-angkasay sa usa ka motorsiklo ug dayun mition kanila og armas ug mideklarar og tulis.
Dali dayun gilabni sa usa sa mga suspek ang bag nga gisudlan sa koleksyon ni Joynez ug human makuha gisukmag pa niini ang naulahi sa nawong ug ang laing suspek mipukpok sa puloan sa armas niini sa nawong sa drayber una pa misibat pahilayo sakay sa motorsiklo paingon sa habagatang bahin sa barangay.
Ang kapulisan padayon pa sa ilang imbestigasyon pagtumbok sa mga suspek ug pagsikop niini aron manubag sa salaod nga ilang nahimo. – Darrel Carumba (BANAT NEWS)