CEBU, Philippines – Gumikan sa mga insidente sa lungkab sa mga tunghaan sa lungsod sa Carmen, 21 ka opisyales sa barangay, barangay tanod ug school administrator sa mga pampublikong tunghaan sa maong lungsod ipatawag sa kapulisan alang sa usa ka emergency meeting karong Lunes subay sa kamandoan sa mayor sa lungsod nga si Mayor Sonia Fua.
Si Insp. Carlos Reyes Jr. hepe sa kapulisan sa nahisgutang lungsod nagkanayon nga tumong niini nga mapangitaan og solusyon ug mahunong ang pagpanglungkab sa mga tunghaan sa ilang lugar.
Niadtong milabay’ng tuig gipang-lungkab sa wala mailhing kawatan ang mga tunghaan sa nahisgutang dapit ug hangtud karon padayon pa kining nanghitabo.
Nasayran nga niadtong Hulyo 3, sa kaadlawon mokabat sa P15 mil ang nadala sa mga kawatan nga milungkab sa Upper Natimao-an Elementary School diin ilang gikuha ang usa ka CPU sa computer, usa ka AVR, keyboard ug mga cord niini.
Samtang niadtong Huwebes petsa 9 ning buwana gilungkab usab ang Cantoong Elementary School ug nakuha ang usa ka set nga personal computer nga mokantidad sa P20 mil. Si PO1 Romano Morales sa Carmen Police Station mipadayag nga duna na sila’y gi-monitor nga grupo sa mga lokal boys sa ilang dapit nga maoy nihimo sa maong krimen. – Guam Logroño (BANAT NEWS)