CEBU, Philippines - Patay ang usa ka construction worker human kini makuryentihi sa mainline sa Cebu Electric Cooperative (CEBECO) samtang nagpanday kini sa atop sa usa ka panimalay sa sitio Camotes barangay Tapilon lungsod sa Daanbantayan niadtong Huwebes sa alas 9:00 sa buntag.
Ang biktima mao si Roderick Rosaga, 27, usa ka construction worker sa BRF Glass and General Merchandise ug molupyo sa barangay Don Pedro sa lungsod sa Bogo.
Matud ni PO1 Rosalie Arnoco sa Daanbantayan Police dihang nahinabi sa Banat News giingong ang maong construction worker namanday kini sa atop nga bahin sa panimalay nga gipanag-iya ni Teodoro Saladaga Sr., niadtong tungura.
Apan aksidenteng midapat sa mainline sa CEBECO nga nahimutang dili layo sa ibabaw nga bahin sa maong panimalay ang gidala niining puthaw nga itaud sa maong panimalay hinungdan sa iyang pagka-kuryente.
Human sa pipila ka minutos nga pagka-kuryente sa biktima gilabay kini ug natagak ug maayo nalang gani kay nasangit sa salagunting sa gitrabaho nga panimalay ug wala gyud malahos sa ubos nga bahin sa semento.
Ang mga kaubanan niya pagkakita sa iyang gidangatan daling mitabang ug mihatud kaniya sa Daanbantayan District Hospital apan gideklarar kining dead on arrival.
Gihulagway sa mga kaubanan niini nga aksidente ang maong panghitabo sanglit wala makabantay ang biktima sa linya sa kuryente nga dili kaayo layo sa atop sa gitrabaho nga panimalay.
Ang patay'ng lawas sa biktima gitakdang ipaubos sa autopsy apan kumbinsido ang mga kaubanan niini nga aksidente gyud ang nahitabo ug dili tinuyo. - BANAT NEWS