CEBU, Philippines – Tudloan sa kagamhanan sa dakbayan sa Sugbu ang kalungsoran sa lalawigan labot sa tawhanong paagi pagdakop sa libodsuroy nga mga iro.
Kini maoy gibutyag ni City Veterinarian Doctor Alice Utlang subay usab sa nagpadayong “big brother program” sa kagamhanan sa syudad.
Kagahapon gitakdang duawon sa mga sakop sa Department of Veterinary Medicine and Fisheries (DVMF) sa City Hall ang lungsod sa Daan Bantayan.
Kini human usab mohangyo si Mayor Sun Shimura sa nahisgutang lungsod nga magpatudlo sila bahin sa international standards sa pagdakop sa mga stray dogs.
Gawas niini miingon si Utlang nga ila usab nga tudloan ang mga kawani sa lungsod sa hustong pagkapon ug pag-ligate sa mga laki ug baye nga iring ug iro.
“Part ni sa atong big brother program, mag-conduct ta og seminar about humane handling gani ug spay and neuter, pound management ba, mo-share ta nila,” sumala ni Utlang.
Midugang si Utlang nga dugang pang kalungsoran sa lalawigan ang ilang ipaubos unya sa nahisgutang seminar agad usab sa hangyo nga ilang madawat.
Ang maong lakang gihimo sa DVMF luyo sa dili maayong relasyon nilang Mayor Tomas Osmeña ug Gobernadora Gwendolyn Garcia.
Giklaro hinoon ni Utlang nga ang ilang pagpasiugda og seminar ngadto sa Daan Bantayan karong adlawa adunay pagtugot gikan sa mayor.
Apan nagtuo si Utlang nga dili usab mobalibad si Osmeña kung adunay laing mga lungsod sa probinsya nga gustong makakat-on sa modernong pound management. Human unya sa Daan Bantayan miingon si Utlang nga ilang isunod sa pagduaw ang siyudad sa Cagayan de Oro nga mipadangat usab kanila og suwat-hangyo.
Gipadayag sa City Veterinarian nga andam kanunay ang ilang buhatan sa paghatag og pagtagad sa mga request nga ilang madawat kalabot sa pound management. – Elly Bolonos (BANAT NEWS)