CEBU, Philippines - Gisugyot ni Cebu City Councilor Arsenio Pacaña ngadto sa Department of Health (DOH) nga ilakip ang pipila ka branded vitamins ug anti-viral drug sa 22 ka mga tambal nga unang giduso niini nga pakunhoran og 50% ang Maximum Retail Price (MRP) subay sa pagpatuman sa Cheaper Medicines Law.
Partikular nga ipaapil ni Pacaña sa listahan mao ang anti-viral drug nga Tamiflu ug ang pipila ka branded multivitamins ug vitamin C nga gikatahong pang-alkontra sa A (H1N1) flu.
Si Pacaña kinsa maoy chairman sa Committee on Trade and Commerce sa City Council nakamatikod nga misaka na ang presyo sa maong produkto.
Gani ang Tamiflu nga gikatahong mapalit lang kaniadto sa tag-P40 matag kapsula, kini giingong tag P150 na karon.
Samtang ang anti-flu vaccine nga kaniadto gibaligya lang sa mga botika og P500 matag vaccine, kini mapalit na usab karon sa tag-P1,800.
Gawas niini namatikdan usab ni Pacaña ang pagsaka usab sa mga baligyang hand sanitizers, face-masks, rubbing alcohol ug ubang protective gadgets.
Ang kahadlok bahin sa A (H1N1) flu maoy gitumbok sa konsehal nga gipahimuslan sa ubang mga negosyante pinaagi sa pagpataas sa presyo sa ilang mga baligya.
Usa ka resulosyon ang gitakdang ipalabang ni Pacaña atol sa sesyon sa City Council nga mag-awhag sa DOH paglakip sa listahan sa pipila ka multi-vitamins ug anti-viral drug gikan sa 22 ka labing girisita nga mga tambal sa nasud.
Sa samang higayon giawhag usab ni Pacaña ang Department of Trade and Industry (DTI) nga mosusi sa giingong “illegal price hikes” sa nahisgutang mga produkto aron maprotihian ang mga konsumidor gikan sa mga negosyante nga giingong mipahimulos sa pagkatap sa A H1N1 flu virus. - BANAT NEWS