CEBU, Philippines – Gibana-banang mokabat sa 800 mil pesos ang danyos sa nasunog nga barkong M/V Tacloban Princess nga kanhi gipanag-iya sa Sulpicio Lines nga gibaradero sa David Villono Shipyard sa sitio Bangkeruhan barangay Tayud lungsod sa Liloan niadtong Biyernes sa alas 4:20 sa hapon.
Matud pa ni FO3 Rolando Reuyan sa Consolacion Fire Department dihang nahinabi sa Banat News ang maong sunog gipaubos lang sa 2nd alarm apan gibana-banang miabot og hapit 1:00 na sa kaadlawon una pa hingpit masumpo ang kalayo.
Subay sa imbestigasyon sa kabomberohan dunay mga welders nga namutol og mga puthaw diha sa maong barko gamit ang acetylene niadtong tungora.
Nagtuo ang mga bombero nga posibleng ang nangalagpot nga baga gikan sa giputol nga mga puthaw maoy sinugdanan niini nga mitugpa sa pundong krudo hinungdan nga kini misilaob.
Wala hinuoy gikareport nga naangol sa maong insidente sanglit daling nanganaog ang mga trabahante ug mitawag sa kabomberohan.
Kahinumduman nga ang maong barko maoy gigamit sa Sulpicio Lines nga gikargahan sa mga biktima sa nalunod nga M/V Princess of the Stars gikan sa Romblon paingon dinhi sa Sugbo apan gibaligya na kini ngadto sa usa ka Christopher Garcia.
Matud pa ni FO3 Reuyan nga gi-cutting sa mga kawani ang mga puthaw sa maong barko tungod kay plano na usab kining ibaligya.
Ang kabomberuhan padayon pang mihimo og dugang imbestigasyon sa maong sunog. – BANAT NEWS