CEBU, Philippines – Wala ka ipsot sa mga tinugyanan sa Philippine Drugs Enforcement Agency (PDEA-7) ang usa ka gipasanginlang leader sa usa ka drug syndicate human masikop atol na sa pagpang-ronda diha sa iyang panimalay sa sitio Matab-ang barangay Day-as lungsod sa Cordova.
Ang suspetsado giilang si Estanislao Yap alyas Ontong, 35, gibutang sa listahan sa PDEA-7 nga level 2 drug pusher nadakpan pinasikad sa search warrant nga giduso ni Judge Soliver Peras sa Regional Trial Court (RTC) branch 10.
Ang tigpamaba sa PDEA-7 Jessie Tabanao mibutyag sa mga tigbalita nga ang pagpang-ronda gipanguluhan mismo ni PDEA-7 Director Randy Pedroso ug gisaksihan ni Barangay Day-as Kapitan Mariano Tahanlangit ug mga barangay tanod.
Sumala pa ni Tabanao nga nakuha sa posesyon ni Yap ang 102 ka mga gagmay’ng paketeng may sulod nga gidudahang shabu, P2,055 nga salaping gituohang halin sa maong drugas, ATM card, ug mga kahimanan sa paggamit og shabu.
Ang maong shabu giingong ibaligya ni Yap og tag P150 matag pakete nga gihulagway ni Tabanao nga gagmay na gyud kaayo kumparar sa kaniadto dihang daghan pa ang suplay sa shabu.
Si Tabanao nagkanayon nga hapit usa ka bulan nilang gi-surveillance si Yap, tungod kay daghan kini og mga tawong nagbantay ug lisod usab kaayong sudlon ang lugar niini.
Gibutyag niini nga makabaligya’g sobra sa 200 gramos ngadto sa usa ka kilong shabu si Yap matag semana ug maoy giingong nag-kontrolar sa suplay sa shabu sa tibuok lungsod sa Cordova.
Base sa ilang intelligence report, si Yap usab ang nag-supply og shabu sa pipila ka barangay sa dakbayan sa Lapulapu ug tulo ka barangay sa dakbayan sa Danao.
Ang akusado miangkon nga ang maong mga drugas gikan sa Mindanao nga ihatud ra diha sa ilang dapit sa usa ka taga Mindanao nga kontak nga wala niya ibutyag ang pangalan.
Si Tabanao nagkanayon nga giisip sa mga silingan si Yap nga “Robin Hood” gumikan kay maghatagan kini’g tag 10 ka kilong bugas matag bulan sa mga silingan hinungdan nga lisod kining sudlon diha sa iyang dapit sanglit daghan man ang makapahibalo kaniya.
Matud pa ni Tabanao dunay unom ka mga gaway si Yap diha sa maong lungsod nga maoy naglihok sa iyang operasyon.
Matud pa ni Tabanao mao kini usa sa hinungdan nga nakaipsot kini sa mga sakop sa pagpa-ronda sa mga sakop sa Criminal Investigation and Detection Group (CIDG-7) sa milabay’ng buwan.
Midugang si Tabanao nga dunay kasong attempted murder si Yap human sa pagpusil niini sa usa ka gituohang asset sa police dihang nadakpan sa kapulisan ang usa sa iyang mga sinaligan.
Kasong possession of illegal drugs ug drug paraphernalia kun kalapasan sa RA. 9165 section 11 ang ilang ipasaka batok sa suspek karong Lunes samtang ang mga drogas nga nasakmit gisumiter pa sa PNP Crime laboratory-7 – Guamittos Logroño ug Romeo Limpangog (BANAT NEWS)