CEBU, Philippines – Mihatag sila si Gobernador Gwendolyn Garcia ug Kongresista Pablo John Garcia sa ikatulong distrito sa lalawigan og tag P500 mil matag usa kanila, atol sa paglusad sa Cebu Midwest Tourism and Investment Promotion Commission (CMTIP) didto sa Barba Sports Complex sa dakbayan sa Toledo sa miaging adlaw.
Unom ka mga lungsod ug usa ka siyudad ang nagkahiusa sa maanindot nga katuyoan aron ilang palambuon pag-ayo ang Midwest nga maoy pinakanindot nga lugar dinhi sa Cebu.
Kini gilangkoban sa mga lungsod sa Aloguinsan, Asturias, Balamban, Tuburan, Barili, Pinamungahan ug dakbayan sa Toledo.
Si Jame Gallardo kinsa maoy convenor sa maong commission nagkanayon, ang tuyo niini mao nga magkahiusa ang unom ka lungsod ug usa ka siyudad nga sakop sa ikatulong distrito sa lalawigan sa pagpalambo sa turismo sa ilang distrito.
Niining paagiha si Kongresista Pablo John Garcia dako og pagtuo nga moabot ang panahon mahimo nang halinon ang gi-representahan niyang distrito.
Kini human sa pagbutang og minilyon ka pesos nga inprastraktura sa iyang distrito, sama sa pagpangaspalto ug sa pagpalapad sa kadalanan.
Sa iyang bahin si Gobernador Garcia nagkanayon usab nga kun unsay gihimo sa ikatulong distrito karon, mahimong isipon nga hagit sa ubang kalungsoran ug siyudad.
Matud pa niya nga timailhan kini nga nagkahiusa ug naningkamot nga makab-ot sa unom ka lungsod ug usa ka siyudad ang ilang kalampusan alang sa kalamboan ning maanindot nga mga lugar sa lalawigan sa Sugbu. – Rey B. Pasaporte (BANAT NEWS)