CEBU, Philippines – Napigsat ang ulo ug lawas sa usa ka truckboy human madat-ugi sa nalimbuwad nga 10 -wheeler truck nga iyang gisakyan dihang nag-deliver sila og bas ug graba sa gitukod nga karsada didto sa pantalan sa Sitio Fermina, barangay Maya lungsod sa Daanbantayan, niadtong Martes sa alas 10:30 sa buntag.
Ang biktima mao si Henaro Geraldez, hingkod , ulitawo, nga taga sitio Kalanggaman, barangay Lutac, lungsod sa Naga ug truckboy sa maong trak, samtang ang drayber usab sa maong trak mao si Louie Lastimosa Plarisan, 35, minyo, nga taga Lutac, Naga.
Si PO2 Edwin Dignos sa Daanbantayan Police Station mibutyag sa Banat News nga puno sa bas ug graba ang maong trak ug gani nag-aginod kini nga nagdagan dihang kalit lang nahugno ang culvert sa karsada nga giagian niini hinungdan nga nalubong ang ligid ug mitakilid ang maong sakyanan.
Gumikan sa kakalit sa maong pagtakilid, nahagbong usab ang biktima, apan nakakapyot pa kini sa lawas sa trak.
Apan samtang nagkombabit ang biktima natiwas gyud og katumba ang trak hinungdan nga nadat-ugan kini ug maayong pagkapigsat sa iyang tibuok lawas gikan sa ulo hangtod sa tiil.
Ang mga nagtrabaho sa maong lugar mikuha dayon sa backhoe ug gibira ug gipabarog pagbalik ang trak una makuha ang biktima kinsa nahisama na sa usa ka papel nga napiyape ug wala nay kinabuhi.
Hinuon ang drayber sa maong trak dali kaayong nakasurender ngadto sa kapolisan sa lungsod ug nagpaabot nalang kini sa tukmang kiha nga isang-at batok kaniya. – BANAT NEWS