CEBU, Philippines – Giunay og pusil sa iyang kapuyo ang usa ka 22-anyos nga dalaga diha sa ilang umahan sa sitio Ay-ay barangay Tag-amakan lungsod sa Asturias niadtong Domingo sa alas 12:00 sa udto.
Ang biktima mao si Analyn Digno, 22, samtang ang suspek mao ra usab ang iyang kapuyong si Ronnel Oberes Revira, 19.
Matod ni SPOI Dennis Nocus, imbestigador sa Asturias Police dihang nahinabi sa Banat News, didto sa umahan ang duha, ang lalaki nagtikad sa ilang uma ug ang biktima nagpasilong.
Nianang pagka-udto gimanduan sa suspek ang biktima nga magluto og paniudto apan gikatahong gipusposan sa dalang silhig sa biktima ang suspek.
Sa kasuko sa suspek, mibarog kini og nibunot sa gidalang armas nga giloklok sa hawak aron magpasalba apan naigo hinuon sa tiyan ang babaye ug nalup-og hinungdan nga iyaha kining gitabang ug gihatud sa Balamban District Hospital.
Ang suspek mitug-an sa kapolisan nga dili gyud niya tuyong pusilon ang biktima kay buot lang niya kining pahunungon pagpunay og bunal kaniya og silhig.Wala pa matino sa kapolisan kun nganong gipuspusan sa biktima og silhig ang suspek. – Darrel Carumba (BANAT NEWS)