CEBU, Philippines - Dakpon ug pamultahon og P500 kadtong molapas sa balaud bahin sa basura diha sa dakbayan sa Mandaue.
Kundili mobayad og multa, patrabahuon sulod sa usa ka adlaw sa pagbahig sa basura diha sa Materials Recovery Facilities.
Kini ang gipatuman ni Barangay Kapitan Jesus Neri sa barangay Guizo sa dakbayan sa Mandaue agi'g pagsanong sa usa ka ordinansa sa ilang barangay.
Si Neri mibutyag sa Banat News nga nakadakop na sila og tulo ka tawo kay milapas sa maong balaud.
Diha usab sa maong ordinansa, gipatuman ang paghatag og premyo nga P250 niadtong mga tawo nga makadakop sa supakero sa balaud sama sa paglabay sa ilang basura nga wala mabahig ang madunot ug dili madunot.
Ang maong ordinansa sa barangay gihimo aron suportahan ang pagpatuman sa Republic Act 9003 kon Ecological Solid Waste Management Act of 2001. - BANAT NEWS