CEBU, Philippines - Gitakda na usab nga mobalik diha sa Cebu City Jail ugmang adlawa ang Justice on Wheels program sa Korte Suprema.
Kini maoy gibutyag ni City Jail Warden Superintendent Efren Nemenio human makadawat og pahibawo gikan sa labaw'ng hukmanan.
Tumong sa Justice on Wheels mao ang pagpaduol sa korte sa matag bilangguan sa nasud paghusay sa mga kaso sa mga bilanggo nga gipangtan-ugan nalang sa suok.
Ang grupo langkuban sa mga huwes, prosecutors ug sa uban pang mga personahe nga gikinahanglan alang sa paghusay og kaso sama sa usa ka hukmanan.
Matud pa ni Nemenio dako kini og matabang aron maluag-luagan ang gidaghanon sa bilanggo sa CCJ kun dunay mahukmang pagawson sa mga hukom sama sa nahitabo sa milabay'ng tuig dihang mibisita ang grupo diha sa CCJ.
Sa samang higayon nagkanayon si Nemenio nga dako usab og ikatabang ang nahisgutang programa ngadto mismo sa mga binilanggo tungod kay ang ubang bilanggo dugay na kaayo diha sa CCJ apan wala pa gyud kasugdi ang ilang husay.
Pipila sa gipabuhian sa Justice on Wheels sa milabay'ng tuig mao kadtong mga bilanggong wala pa gyud makaatubang sa korte bisan nabilanggo na og pipila ka tuig ug buwan, kansang mga kaso duna ray silot nga mas ubos pa sa panahong nausik samtang iyang gipaabot ang paghusay sa kaso.
Niining higayuna nagtuo si Nemenio nga dugang mga binilanggo ang mabuhian ilabi na niadtong nakahimo lang og ginagmay nga krimin.
Ang nahisgutang lakang kabahin sa kamanduan ni Chief Justice Renato Puno ngadto sa mga huwes sa tibuok kapupud-an nga mahatagan og paspas nga husay ug katarungan ang mga bilanggo ug sa ilang mga biktima. - BANAT NEWS