CEBU, Philippines – Giangkon ni Lahug Cebu City barangay kapitan Mary Ann delos Santos nga ang oposisyon dinhi sa Sugbu mikonsulta sa Kapitolyo sa ila nga piliong kandidato sa pagkamayor ug pagkabise mayor sa siyudad sa Sugbu sa umaabot nga election sa sunod tuig.
Sa interview sa DyRF, si kapitan Delos Santos miingon nga nagpadayon pa ang selection sa kinatibuk-an line up sa oposisyon ug kini gihimo pinaagi sa konsultasyon sa tanang mga oposisyon leaders sa dakbayan.
Gitataw niini nga naapil usab sa ilang konsultahon mao si Governor Gwendolyn Garcia sa kagamhanan sa lalawigan sa Sugbu tungod sa pagtuo nga dako kini og matabang sa pagpalig-on sa partido sa oposisyon.
Matud sa kapitan nga sa pagkakaron dili pa sila makatumbok kun si kinsa gyud ang ilang kandidato sa pagkamayor ug pagkabise mayor.
Apan iyang gitataw nga si kanhi Cebu City mayor Alvin Garcia ug Atty. Aristotle Batuhan ang nipadayag nga interesado nga modagan sa pagkamayor.
Dugang pa ni Delos Santos nga ang iyang naklaro sa pagkakaron mao ang iyang pagdagan sa pagka-kongresista sa Cebu City North district bisan pa man og ang igsoon pa ni Tomas Osmeña nga si Minnie mao iyang makontra.
Iya usab nga gitumbok nga si Jonathan “Atan” Guardo maoy modagan sa Cebu city South District bisan pa man og si Mayor Tomas Osmeña pa ang mokontra sa pagkakongresista sa habagatang distrito. – Chester Abadilla (BANAT NEWS)