CEBU, Philippines – Hawanan karong adlawa ang tanang kadalanan sa mga sitio diha sa barangay Pasil ning dakbayan sa Sugbo gikan sa mga illegal nga estraktura.
Ang clearing operations ipahigayon tungod usab sa mga reklamo nga nadawat sa barangay labot sa nagkagamay nilang agianan.
Partikular nga nangreklamo mao ang mga residente sa barangay nga mosakay og taxi nga maglisod na pagsulod sa ilang pinuy-anan.
Kini tungod usab sa ubay-ubay nga mga illegal structures nga gipangtukod nga giingong halos na mopatunga sa karsada.
Matud ni Kapitan Romeo Ocarol sa Pasil nga sila mismo maoy mangulo sa clearing operation uban usab sa pag-abag sa demolition team sa siyudad.
Nagkanayon ang kapitan nga sila nakapahigayon na kaniadto og mga clearing operation, apan giingong namalik na usab ang mga ilegal nga estraktura.
Kini ang hinungdan nga subli nilang panggub-on karong adlawa ang mga estraktura nga makabalda sa moagi nga mga sakyanan.
Gitataw hinuon ni Ocarol nga dili nila did-an kadtong mga naninda daplin sa dalan apan kini ila lang nga isibog ug ipahimutang.
“Amo lang sila nga isibog, among badlisan ang dalan nga dili sila pwede molapas pero dili gyud ingon nga ato silang kuhaan og panginabuhian,”sumala ni Ocarol.
Gipadayag sa kapitan nga lakip unya sa ilang i-regulate mao ang naghinobra ug nagkadaghan nga mga traysikad sa ilang barangay.
Matud ni Ocarol nga usa ka ordinansa ang ila unyang pandayon nga mag-regulate sa mga trisikad aron kini dili na makapatuyang og parada sa kadalanan.
Tuyo sa kapitan nga mahapsay ang ilang gamay nga barangay bisan pa man kun giingon nga naghinobra na ang populasyon niini. – Elly Bolonos (BANAT NEWS)