CEBU, Philippines – Ang mga opisyal sa walo ka barangay sa dakbayan sa Talisay kauban ang ilang mga barangay health worker (BHW), mga sakop sa komitiba sa kalikopan nga gipangulohan ni Konsehal Bernard Odilao, ug mga non-government organization (NGO) naghiusa sa pagpanglimpiyo sa sapa sa Mananga.
Si Odilao mibutyag sa Banat News kagahapon nga ilang gihimo ang pagpanghinlo sa maong sapa agi og pagtamod sa buwan sa Hunyo isip “Environmental Month”.
Gibutyag ni Odilao nga sukad pa sa miaging buwan gisugdan na nila ang paglimpyo sa sapa sa Mananga aron kini mapreserbar.
Hinuon nagkanayon siya nga dili lamang sa buwan sa Hunyo sila manghinlo sa maong sapa kundili himoon nila kini matag buwan aron magpabilin ang kahinlo sa maong sapa ug sa palibot niini.
Si Odilao nagkanayon nga sa milabay'ng mga katuigan daghan kaayo ang mangaligo ug manglaba sa sapa sa Mananga tungod sa kalimpiyo niini, apan karon puwerte nang itoma sa tubig ug baho pa gyud kaayo tungod sa mga basura nga anaa ilabay sa katawhan sa maong sapa.
Gusto ni Odilao nga mahibalik ang kahinlo sa sapa sa Mananga aron makadani kini og mga turista.
Ang mga barangay nga nakighiusa sa pagpanglimpyong gihimo sa maong sapa naglakip sa Lagtang, Tabunok, Lawaan II, Lawaan III, Mohon, Dumlog, Biasong ug San Isidro. – Brenda D. Batuto (BANAT NEWS)