CEBU, Philippines – Samdan ang usa ka Staff Sergeant sa 52nd Infantry Battalion sa Philippine Army nga nadestino sa lungsod sa Tuburan human unaya og pusil sa usa sa iyang mga sakop nga miyembro sa Citizen Armed Forces Geographical Unit sa milabay'ng Huwebes sa gabii.
Ang pagpamusil nahitabo diha sa sulod sa foxhole sa biktimang si SSgt. Dioscoro Javelona, 47, nga maoy detachment commander sa mga CAFGU nga nagbase diha sa barangay Marmol sa samang lungsod.
Si SSGT. Detachment Commander Dioscoro Javelona, 47, sa 52nd Infantry Batallion sa Philippine Army giunay sa pagpusil sa iyang sakop nga CAFGU nga si Denio Suico.
Sa imbestigasyon sa kapolisan nasayran base sa alegasyon sa biktima nga iyang nahibaw-an nga ang suspetsado nakig-inom uban sa laing mga Cafgu sa usa ka tindahan duol ra usab sa ilang nahimutangan.
Sa dihang natulog na siya, mao nalay iyang namat-an nga misulod ang suspek nga nagbitbit og .30 caliber Garand Rifle dayong pusil kaniya makausa nga miresulta sa iyang pagkaigo diha sa walang bahin sa tiil.
Ang suspek daling mikaratel og dagan pagawas samtang ang biktima gidala sa Tuburan District Hospital.
Ang 78th IB ug kapolisan milusad dayon og hot pursuit operation sa lungsod sa Alegria tungod kay dunay igsuon ang suspek sa maong lungsod apan pakyas kini.
Si Pfc. Joy Dela Peña sa 3rd Civil Relations Group sa Central Command sa pakighinabi sa Banat News nga base usab sa impormasyon gikan kang Lt. Col. Raymundo Bañares nga ang hinungdan sa pagpamusil sa suspetsado mao ang kasuko niini sa iyang asawa ug tibuok adlaw nag-inom.
Sa dihang nag-estoryahay na ang duruha kalit nga nagpabuto ang suspetsado ug naigo ang ilang labaw. – Lesley Caminade (BANAT NEWS)