CEBU, Philippines – Gipamusil ug nangamatay ang managsuon ug ilang ig-agaw human gikatahong girapido og KG9 machine pistol sa ilang kanhi agalong negosyante samtang naglingkod ang tulo daplin sa dalan gawas sa ilang balay sa sitio Cambiohan,Poblacion siyudad sa Danao niadtong Huwebes sa alas 9:45 sa gabii.
Ang mga biktima mao ang magsuong sila si Arturo Enriquez, 25, ug Rosallo Enriquez, 24, ug ig-agaw nga si James Enriquez, 20, pulos molupyo sa nahisgutang lugar.
Ang gitudlong mamumuno mao si Marlon Gacrama, usa ka negosyante og mga computer games nga kanhi amo sa mga biktima ug nagpuyo ra usab sa susamang lugar.
Matud pa ni SPO4 Teofilo Deguilmo sa Danao City Police dihang nahinabi sa Banat News diha daplin sa dalan ang tulo dihang naagian sa suspek nga giingong nakainom ug kalit nga mirapido kanila sa gidala niining armas.
Si James namatay diha-diha tungod sa duha ka samad pinusilan sa tiyan samtang si Arturo naigo usab sa walang bahin sa dughan ug walang paa ug si Rosallo naigo sa wala gihapong dughan ug tiyan.
Ang managsuon gidali pagdala sa Danao District Hospital apan gideklarar silang dead on arrival.
Samtang ang suspek dali kaayung nakasibat pahilayo human sa krimen, nakuha sa kapolisan diha sa crime scene ang unom ka mga basiyo sa kalibre .9mm.
Si Supt. Elmer Lim, hepe sa Danao City Police Station sa pakighinabi sa Banat News mibutyag nga personal nga kalagot sa suspek ngadto sa mga biktima ang motibo sa pagpamusil.
Matud pa ni Lim, base sa pasiunang impormasyong ilang nakuha gikatahong nasuko ang suspek ngadto sa tulo tungod sa pasangil nga sila maoy nangawat sa iyang mga butang sa negosyo.
Gikatahong misangpot pa kini kaniadto sa sinukmagay dihang gitabangan sa managsuong biktima ang suspek gumikan sa maong mga alegasyon.
Dugang pang Lim nga sa sayo pa niana dunay nakatug-an kanilang nagpunay og test firing si Gacrama sa iyang KG9 submachine pistol.
Matud pang Lim ang suspek ilado kaayo sa maong dapit gumikan sa mga negosyo niini gawas sa computer games duna sad kini bakery ug piggery sa bukid. – BANAT NEWS