CEBU, Philippines – Libuan ka mga molupyo sa 54 ka mga coastal ug urban barangay sa siyudad sa Sugbu uban sa nagkadaiyang mga volunteer dungan nga manglimpyo karong adlawa.
Kini mao na ang ika-15 nga coastal clean-up ug ika-11 usab nga urban barangay clean up nga gipasiugdahan sa Coastline Management Board sa siyudad.
Matud sa vice chairman sa CMB nga si Konsehal Edwin Jagmoc nga ang nag-unang tumong sa kalihukan mao ang pagdasig sa mga molupyo sa pagpanglimpyo.
Kini dili lang sa matag tulo ka buwan nga clean-up, kun dili aron mahimo na nga kabahin sa ilang inadlaw-adlaw nga gimbuhaton.
Subay niini gidasig ni Jagmoc ang tanang residente sa siyudad nga moduyog sa kalihukan karong adlawa pinaagi usab sa pagpanglimpyo sa ilang kaugalingon.
Lakip sa mga volunteer nga mipasalig pagduyog sa coastal ug urban barangay clean-up mao ang mga anti-crime group sama sa Centennial Force, BIN, ug uban pa.
Gipaabot usab nga motabang sa pagpanglimpyo ang mga polis trainee, pipila ka sakop sa Naval Forces Central ug ang Parole and Probation. – Elly Bolonos (BANAT NEWS)