CEBU, Philippines - Duha ang angol sa dinasmagay sa motorsiklo kontra multicab didto sa kurbada sa barangay Dalid, lungsod sa Tabuelan niadtong Sabado sa 1:15 sa hapon.
Ang mga na-angol mao ang drayber sa motorsiklo nga si Mark Montecillo, hingkod, nga taga Catmon, ug ang angkas niini nga si Ylan Donaire, hingkod nga taga Antipolo, Manila.
Samtang ang drayber usab sa multicab mao si Elizabeth Retuerto, hingkod, nga taga Pagsabungan siyudad sa Mandaue.
Si SPO2 Edre Ortega sa Tabuelan Police Station mibutyag sa Banat News nga ang motorsiklo
nagpaingon sa barangay Lugo, sakop sa lungsod sa Borbon, ug pag-abot niini sa kurbadang bahin sa Dalid, nagkadinasmagay kini ug ang multicab nga nagpaingon ngadto sa lungsod sa Tabuelan.
Gumikan sa kakusog sa pagkadasmag, nangalagpot ang drayber ug ang iyang angkas nga misangpot sa pagkasamad ug pagkabun-og sa ilang kalawasan.
Ang mga bikitima gihatod dayon ngadto sa Juan Dosado Hospital sa lunsgod sa Sogod, samtang ang drayber sa multicab mitahan usab dayon ngadto sa kapolisan sa maong lungsod. – BANAT NEWS