CEBU, Philippines – Duha ka tanod giapil sa kiha mahitungod sa nahitabong pinusilay nga mikalas og upat ka tawo diha sa barangay Maghaway sa Talisay niadtong Biyernes sa gabii, Mayo 29, 2009.
Si Supt. Henry Biñas, hepe sa kapolisan sa Talisay City Police Station sa pakighinabi niini sa Banat News kagahapon nagkanayon nga napasaka na nila niadtong Lunes ang kasong double murder batok kang Felix Abacahan Jr.
Si Abacahan maoy usa sa mga nangaangol sa maong engkwentro nga usa usab ka barangay tanod ug giingong nakaaway na sa barangay kagawad nga napatay nga si Pedro Delvo.
Gawas kang Delvo napatay usab ang iyang umagad nga si Alex Murallos, ingon man ang mga kauban ni Abacahan nga sila si Jonifer Villacencio ug Melchor Tabay.
Ang mga tanod nga giapil og kiha sa kapolisan mao ang mga tanod nga sila si Allan Senogat ug Susano Labrador ug sa laing duha ka wala mailhing lalaki tungod sa pagkamatay kang Delvo ug Murallos.
Matud pa ni Biñas nga ang pag-apil sa kiha sa duha ka tanod ug sa laing duha ka mga wala pa mailhing lalaki gibase sa pamahayag sa batang anak ni Delvo kinsa mitan-aw sa gipahigayong variety show niadtong higayona.
Samtang sa habig usab sa kamatayon nila ni Tabay ug Villacencio, gipasakaan usab og laing kasong double murder sila si Precillano Abadiano ug Florencio Cuyos.
Kini base usab sa affidavit nga giduso ni Abacahan nga nagtumbok kanila nga maoy namusil kanila nga miresulta sa kamatayon nila ni Tabay ug Villacencio.
Base sa resulta sa paraffin test positibo sila si Delvo, Villacencio Tabay sa mga gun powder residues nga usa sa mga gituohang timailhan nga nakapabuto usab sila og armas, samtang negatibo niini si Murallos.
Si Abacahan kinsa nalandig sa tambalanan wala mosugot nga ipaubos sa paraffin test. - Brenda Batuto (BANAT NEWS)