CEBU, Philippines – Subling gituboy ni Cebu City Mayor Tomas Osmeña ang iyang bise mayor nga si Michael Rama pagka-mayor sa siyudad alang sa sunod tuig nga eleksyon.
Kini maoy gibutyag ni ABC president Eugenio “Jingjing” Faelnar atol sa ilang gipahigayon nga general assembly niadtong miaging Sabado.
Matud pa ni Faelnar nga atol sa pakigpulong ni Osmeña giawhag niini ang mga barangay kapitan nga hatagan og higayon ang bise mayor nga makadumala sa siyudad.
“Sigun sa pronouncement ni Tommy during our general assembly miingon siya nga we will just give Mike a chance to manage Cebu City,” sumala ni Faelnar.
Ang pamahayag ni Faelnar gidasunan usab sa mayor human niya makita ang pakigbatok ni Rama sa kagamhanang probinsyal partikular na kang Gobernador Gwendolyn Garcia.
“I always endorse Mike, it’s just that I got angry at him when he starts making sipsip to the governor…anyway, he’s now taking a stand against the governor,” matud pa ni Osmeña.
Sa nasayran, dunay mga barangay kapitan kaniadto nga kaalyado sa mayor nga mipirma og manifesto nga nagtuboy og laing kandidato pagkamayor sa siyudad.
Usa niini mao si Santo Niño barangay captain Pancho Ramirez Sr., apan ning bag-uhay lang mipadayag na usab og kaandam pagpaluyo kang Rama human sa subling pag-endorso sa mayor.
“Wala tay mahimo ana kay mao may giingon ni bosing, so, atong paluyuhan kay sa akong tan-aw si Mike na man gyud ang iyang ituboy,” sumala ni Ramirez.
Apan ang laing barangay kapitan nga lakip sa mipasiugda sa manifesto hugtanon gihapong nipadayag sa iyang pagsupak sa awhag ni Osmeña.
Kini mao si Pit-os barangay captain Nilo Tariman nga taud-taud nang nipadayag nga siya dili ganahan sa style ni Rama. “Dili gyud ko, basta dili ko kay daan na man kong gaingon nga dili gyud ko ganahan ni Mike,” sumala ni Tariman.
Wala hinuon nakatambong si Tariman sa nakalabay nga ABC general assembly apan kini nagtuo gihapon nga dili si Rama maoy suportahan ni Osmeña sa 2010 elections.
Kahinumduman nga ang giendorso kaniadto nilang Tariman ug kaubanan pagka-mayor sa siyudad mao si Kongresista Raul del Mar. – BANAT NEWS