CEBU, Philippines - Namatay diha-diha ang usa ka lalaki nga nagsakay og motorsiklo human kini mabangga sa poste sa kuryente didto sa barangay Marigondon, dakbayan sa Lapulapu, kagahapon sa kaadlawon.
Ang biktima mao si Roque Ancahas III, 37, minyo, nga taga sitio Kalubian, barangay Marigondon.
Si SPO1 Roel Nalzaro sa traffic division sa Lapulapu mibutyag sa Banat News nga ang biktima nagpaingon ngadto sa sentro sa dakbayan sa Lapulapu sa mga alas alas 5:49 kagahapon sa kadlawon gikan sa ilang balay.
Apan matud pa sa mga nakasaksi nga nagbaguros sa kakusog ang motorsiklong gisakyan niini ug dihang miliko kini sa maong dapit wala na kakontrolar sa iyang sakyanan hinungdan nga nadasmag sa poste sa Mandaue Electric Co.(MECO)
Ang biktima dali nga gihatod ngadto sa Lapulapu City Hospital diin kini gideklarar nga dead on arrival.
Hinuon wala magduda ang kapolisan nga hubog ang biktima kay gikan man kini sa ilang balay. – BANAT NEWS