CEBU, Philippines - Bisan paman sa pagpadayag og suporta sa mga barangay kapitan sa dakbayan sa Lapulapu kang Mayor Arturo Radaza kun ugaling kini modagan sa pagka-kongresista sa maumol unyang “Lone District” o ba kaha bisan na sa 6th District, daw di interesado niini ang mayor.
Sumala pa ni ABC president ug barangay Kapitan sa Pajo nga si Leo Mercado daw nahagit ang mayor pagdagan sa pag-usab sa mao gihapong posisyon gumikan sa mga report nga mikatap nga giingong ang nakapadaog kaniya mao si Konsehal Junard "Ahong" Chan.
Matud pang Mercado sa ulahing pakig-estorya nila ni Radaza kini mipadayag nga nahagit siya sa maong report ug buot niining pamatud-an sa mga Oponganon nga sayop ang maong estorya.
Si Chan pipila na ka bulan ang nakalabay mibiya sa kampo ni Radaza.
Gumikan niini si Radaza mihimo og mga lakang kung pwede pa siyang makadagan pag-usab pagkamayor sa dakbayan bisan paman og last term na niya karon.
Buot gamiton ni Radaza nga basehan mao ang pagkaputol sa iyang serbisyo sa publiko human siya gisuspenso og unom ka bulan kaniadto ug base usab sa nahitabo kang Cebu City ABC president Eugenio “Jingjing” Faelnar.
Si Faelnar gitugutang pagpabalik pagdagan pagka-kapitan sa barangay Guadalupe gumikan kay nasuspenso usab kini kaniadto.
Si Chan sa iyang bahin mihimakak nga siya’y miluwat og pamahayag nga siya ang dako og natabang sa kandidatura ni Radaza maong nakadaog kini sa milabay'ng mga piniliay.
Mipasabot si Chan sa Banat News nga ang nanggawas nga report base lang kini sa obserbasyon sa katawhan nga siya maoy usa sa mga instrumento sa kadaugan ni Radaza.
Dugang usab ni Chan nga katungod usab ni Radaza ang pagdagan pag-usab ug bisan na pag-atbang kaniya sa bisan unsang posisyon sa umaabot nga piniliay, apan miklaro kini nga hangtod karon wala pa siya makadesider kung unsang posisyon ang iyang daganan. – BANAT NEWS