CEBU, Philippines – Ang Mandaue City College Jagobiao Campus sa dakbayan sa Mandaue nga gidumala sa presidente niini nga si Dr. Paulus Marie Canete nagpataod og bag-ong linya sa kuryente aron dili mabalda ang pagbukas sa klase niini karong sunod semana.
Ang maong tulunghaan giputlan og kuryente sa miaging semana tungod sa kadako sa utang niini nga wala hibayri ngadto sa Visayan Electric Company (VECO).
Si Canete nga nahinabi sa Banat News miingon nga ang pagkaputol sa ilang kuryente nakahatag kanila og dakong kahigayonan nga makapataud sila og kaugalingong metrohan.
Gipaniguro niya may suga na sila karong sunod semana inigbukas sa klase kay padayon man ang pagtrabaho sa taga Veco sa pag-estalar sa linya niini para sa ilang eskuylahan.
Gibanabana nga may 2,000 ka estudyante ang motungha sa maong eskuylahan karong sunod semana.
Wala mabalaka si Cañete tungod kay may giandam siyang generator sa higayong dili pa mahuman ang instalasyon sa linya sa kuryente inigbukas sa klase.
Sa samang higayon naningkamot usab si Cañete nga makabaton og kaugalingong linya sa tubig kay giputlan usab sila niini dungan sa kuryente. Dugang pa niya nga luyo sa ilang nasinatiang mga suliran apan wala kini makatandog sa ilang kahimtang kay gani nagkadaghan man ang mga tinun-an nga nagpa-enroll sa maong tulunghaan.
Si Cañete miingon nga sa miaging semester ang MCC Jagobiao Campus may 600 lang ka mga tinun-an nga nagtungha apan sa pagkakaron mikabat na sa 1,600 ang nagpa-enroll.
Naglakip sa mga kurso nga gitanyag sa MCC Jagobiao Campus mao ang Computer Science, Education, Liberal Arts, Engineering, Nursing, Criminology, Culinary Arts ug uban pa.
Gitataw ni Cañete nga ang MCC Jagobiao Campus maoy nahimong dangpanan sa mga estudyanteng kabus sanglit tag P100 ang matag unit niini ug de kalidad ang matang sa ilang pagtuon kay ang mga professor nga nagtudlo diha pulos masteral degree ug mga doctor of education. - Romeo T. Limpangog (BANAT NEWS)