CEBU, Philippines – Buot nga ipaklaro ni Chief Supt. Lani-O Nerez, ang director sa Police Regional Office-7 kun unsa gyuy papel sa mga sakop sa Barangay Intelligence Network sa ilang pag-abag sa kapolisan.
Si Nerez mitug-an nga nasayod siya sa nahitabong insidente niadtong Domingo sa kaadlawon diha sa Salinas Drive sa barangay Lahug nga dunay gipasanginlang mga polis ug BIN sa Cebu City Police Office nga namusil og motoristang milikay sa ilang checkpoint.
Matud pang Nerez gusto niyang klaruhon kun unsa gyuy papel sa mga BIN sa ilang pag-abag sa kapulisan ingon man sa komunidad tungod kay base sa iyang kasinatian ang mga BIN adto ra gyud unta maghatagan og impormasyon sa mga barangay tanod.
Samtang ang mga barangay tanod maoy mohatag niini ngadto sa kapulisan tungod kay sila may dunay gihatagan og awtoridad ubos sa balaod.
Nunot niini ipatawag ni Nerez ang mga ‘handlers’ sa mga BIN aron seminaron unsay ilang trabaho, buot usab niyang ma-train ang mga BIN ug limpyohan gikan sa mga badlungon ang maong grupo.
Subling giklaro ni Nerez nga walay BIN nga gitugutang makadala og armas gawas lang niadtong dunay kumpletong papeles.
Si Sr. Supt. Patrocinio Comendador, ang hepe sa CCPO mipadayag nga wala pa nila sirhi ang imbestigasyon batok sa mga sakop sa Investigation and Detective Management Branch (IDMB).
Paabuton nilang ihinayon sa mga biktima ang kiha batok sa maong unit, hinuon ang mga biktimang sila si Ronnel Piañar Jr. ug Orlan Cortado mipahibalong di sila mohinayon og kiha ni Insp. Juanito Pajantoy ug mga kaubanan aron paglikay sa samok. Si Comendador mipadayag nga dako og natabang ang BIN kanila isip force multiplier, sa pagkakaron 1,198 ka tawo ang bantayan sa usa ka polis sa CCPO ang ratio, nga ang ideal unta kaayo mao nga usa ka police sa matag 500 ka tawo. - Guam Logroño (BANAT NEWS)