CEBU, Philippines – Misibog pagsang-at og kaso batok sa mga sakop sa Investigation and Detection Management Branch (IDMB) ang duha ka motoristang unang mipasangil nga sila gipusil ug gikulata tungod sa paglikay nila sa checkpoint.
Ang checkpoint gihimo diha sa Salinas Drive sa barangay Lahug niadtong Domingo sa kaadlawon nga miresulta sa pagkaangol ni Ronnel Piañar Jr. 24.
Si Piañar gikuyugan sa iyang amahang si Ronnel Sr. ug angkas nga si Orlan Cortoda mipatim-aw sa buhatan sa Homicide Section aron pagsibog sa kaso.
Kahinumduman nga si Piañar mipasangil sa kapolisan nga gipusil siya paglabay diha sa checkpoint ug naigo sa walang bukton hinungdan nga nadasmag sila sa usa ka awto ug misaliring.
Ang opisyal sa IDMB nga mikuyog sa checkpoint nga si Insp. Juanito Pajantoy mihimakak sa pasangil nga duna silay gipusil ug gikulata, bugtong ilang gibuhat mao ang paggukod kanila ug dihang nadasmag ilang gidala sa tambalanan.
Atubangan ni Chief Insp. Mario Monilar, hepe sa Homicide Section mipadayag ang duha nga di mohinayon og kiha kang Pajantoy ug mga sakop tungod kay di sila gusto og samok, ang ilaha lang nga matabangan si Piañar sa iyang tambal.
Apan si Sr. Supt. Patrocinio Comendador hepe sa kapulisan sa dakbayan sa Sugbu bisan di mokiha ang mga biktima iyahang ipapadayon ang imbestigasyon ni Monilar batok sa IDMB pagtino kung sila sad-an ug masilutan. - Guam Logroño (BANAT NEWS)