CEBU, Philippines – Nanawagan si Bokal Juan Bolo ngadto sa Land Transportation Office (LTO-7) pagsusi sa ilegal nga kalihukan sa mga drug testing center nga accredited sa LTO nga gikatahong mo-ilis og specimen aron makapasar ang drayber sa drug test isip rekisitos paglukat ug pag-renew sa driver’s license.
Sumala pa ni Bolo nga angay hatagan og gibug-aton ang reklamo ni Dr. Danilo Dionson, tag-iya og lehitimong drug testing center sa Mandaue nga matud pa adunay mga opisyal ug kawani sa LTO-Mandaue nga mi-tolerate sa pagpangilis og specimen sa mga drayber nga mga adik.
Giawhag ni Bolo si LTO-7 director Raul Agilos pagsusi sa Amalgamated Phils. Inc. tungod sa nadawat niyang reklamo nga modawat kini og urine sample sa drayber apan kawani sa LTO ang modala niini ngadto sa drug testing center niini.
Si Bolo nanghinaot nga tinud-on ni Aguilos ang bahad niini pag-imbestigar sa mga opisyal ug kawani nga malambigit sa maong binuang. - Chester Abadilla (BANAT NEWS)