CEBU, Philippines – Inihap na lang ang mga adlaw sa ubay-ubay nga mga stallholders sa nagkadaiyang mga satellite markets sa dakbayan sa Sugbu human mapupos na ang tagal sa pag-renew sa ilang mga kontrata sa market authority.
Nasayran nga gisugdan na paghatag ang notice to vacate ngadto sa mga stallholders nga hangtud karon wala makapirma og bag-ong kontrata.
Matud pa ni City Market Administrator Racquel Bohol-Arce nga ang hingtungdang mga stallholders ila lang gihatagan og pito ka adlaw pagbakante sa ilang pwesto.
“This week ta nagsugod paghatag og notice to vacate, ang dili gihapon makatuman sa mga rekisitos, i-consider na nato nga vacant next week,” sumala ni Arce.
Miingon si Arce nga dunay kapin sa 280 ka mga stallholders gikan sa napulo ka satellite market sa siyudad ang wala maka-renew sa ilang kontrata.
Duha niini anaa naninda sa Pardo Public Market ug ang labing daghan giingon sa market administrator nga anaa sa Taboan Public Market.
Una na hinuong gihulagway ni Arce ang Tabo-an nga maoy labing problemado nga merkado sa tanang satellite market sa dakbayan tungod kay ang maong merkado gihimong pinuy-anan sa uban ug gikatahong gilubluban sa mga snatcher, kawatan ug uban pang badlongon sa katilingban.
Gipahibalo hinuon ni Arce nga ila nang gihinay-hinayan pagsulbad ang maong problema hangtud nga mapatuman sa hingpit ang market code sa siyudad.
Nagkanayon ang market administrator nga sa sunod semana, siya mohatag na og lista sa mga bakanteng stalls ngadto sa market authority aron matakda gilayon ang pagpahigayon og bidding alang sa bakanteng mga stalls ngadto sa mga manindahay nga interesado usab niini. Midugang si Arce nga lakip unya sa ipaubos sa bidding mao ang kapin sa 400 ka mga stalls nga daan nang bakante ug walay nag-abang. - Elly Bolonos (BANAT NEWS)