CEBU, Philippines – Gipahibalo ni Assistant Ombudsman Virginia Palanca Santiago nga ilang gipadali ang paghuman sa imbestigasyon sa kontrobersiyal nga katukuran sa Cebu International Convention Center (CICC).
Sumala pa ni Santaigo nga padayon pa ang ilang pagkuha sa mga dokumento aron pagsuta kun may kamatuoran ba ang pasangil nga gipaburot ang presyo sa pagtukod sa kagamhanan sa probinsiya sa Sugbu sa CICC.
Matud pa ni Santiago nga ang graft investigator nga maoy gitahasan sa maong kaso nga si Engr. Erick Brazon gihatagan niya og exemption nga dili modawat og laing kaso sulod sa usa ka bulan.
Kini aron paghatag og igong panahon ni Brazon sa paghuman sa maong imbestigasyon hayan karon sunod nga bulan.
Si Santiago miingon usab nga padayon silang nakig-coordinate sa Commission on Audit alang sa paglig-on sa ilang mga ebidensiya batok na sa mga opisyales sa probinsiya sa Sugbu.
Nagdumili usab si Santiago sa pagluwat og komentaryo labot na sa gipakanaug nga desisyon ni Judge Ester Veloso nga nagmando sa kagamhanan sa probinsiya sa Sugbu sa pagbayad og P263 milyones ngadto sa WT Construction isip bayad sa additional work partikular na sa on site development sa CICC sa dakbayan sa Mandaue.
Kini tungod kay nagpadayon pa ang ilang imbestigasyon labot na sa maong proyekto.
Ang tigpamaba sa Kapitolyo nga si Rory Sepulveda daan nga namahayag nga kinahanglan pa nilang subayon ang costing sa maong proyekto sanglit ang gimandong pabayran sa korte kanila ngadto sa WT Construction mas dako pa sa ilang kwentadang angayang bayranan.
Mipasalig hinuon si Sepulveda nga dunay igong pundo ang Kapitolyo nga ibayad sa mga obligasyon niini. – BANAT NEWS