CEBU, Philippines – Kapulisan sa lungsod sa Sibonga gipaubos sa imbestigasyon sa kapulisan sa Probinsya sa Sugbu human dunay nadawat nga text message ang text hotline sa headquarters sa CPPO nga adunay dinakpan sa kasong illegal possession of firearm ang wala pasakai’g kaso human makabayad sa mga police.
Kini maoy gibutyag ni Supt. Erson Digal ang Officer-in-Charge (OIC) sa CPPO human iyang nadawat ang text messages gikan sa usa ka concerned citizen nga nagpahibalo kaniya nga usa ka Benjie Licaylicay, handler og manok, taga Poblacion Sibonga ang dinakpang gibuhian.
Gikatahong niadtong milabay’ng semana nakuhaan og .45 kalibreng pistola ug natanggong sulod sa tulo ka adlaw apan giingong gibuhian dihang nakadawat og suborno nga P10 mil si PO2 Ederlino Bacusmo nga iya usab gihatag ngadto sa ilang hepe nga si Sr. Insp. Noli Cernio.
Gipasabot ni Digal nga matinuod man o dili ang maong pasangil angayang ilang imbestigahon ang reklamo.
Apan si PO2 Bacusmo nga nahinabi Banat News kagahapon sa hapon hugot nga nihimakak sa maong pasangil ug mipadayag nga usa lang ka pagdaot sa ilang imahen ang gihimo sa impormante.
Matud pa ni PO2 Bacusmo nga dili tinuod nga wala nila pasakai’g kaso kini tungod kay duna silay records nga gipakita sa PIDMB nga niadtong petsa 11 ning buwana nga ilaha gyung napasakaan og kasong illegal possession of firearm ang akusado diha sa Municipal Trial Court sa lungsud sa Sibonga.
Giingong nakuhaan kini og .38 kalibre uban sa lima ka buhing bala ang akusado ug dili .45 nga maoy gipahibalo sa impormante.
Gibutyag niini nga niadtong kaadlawon sa petsa 8 ning buwana ilang nadakpan si Licaylicay diha sa Plaza sa Poblacion atbang sa Police Station dihang nakit-an sa iyang kauban sa nag-roving nga dunay nagbagal sa hawak.
Apan dihang ilang giduol ilang nakit-an ang .38 diha sa tiilan niini nga gituohan nilang iya sa akusado ug gihagbong lang dihang nakabantay sa mga polis. - Guam Logroño (BANAT NEWS)