CEBU, Philippines - Duha ka mga pinangita sa balaud ang nangadakpan usa kanila ang napusilan human makakita og lalis samtang nagduwa og tong-its sa barangay Kabangkalan lungsod sa Tuburan niadtong Sabado sa alas 12:30 sa kaadlawon. Ang napusilan nga wanted diay sa kasong murder giilang si Jefrey Alindao, 23, molupyo sa barangay Cogon sa samang lungsod. Samtang ang gitumbok nga mipusil kaniya mao ra usab ang iyang mga kaduwa sa tong-its nga nailhan lang sa mga pangalang Badwin ug Noel.
Matud ni SPO2 Delicio Esconde sa Tuburan Police dihang nahinabi sa Banat News, sa tantong panagduwa nagkalalis ang biktima sa iyang mga kaduwa kabahin sa pusta ug misangpot kini sa away.
Dihang nakabantay nga mibunot og armas ang usa sa gikalalis midagan si Alindao apan napusilan gyud kini sa tuong paa, gidala siya sa Tuburan District Hospital.
Human maabot sa kasayuran sa kapolisan ang insidente ilahang nadiskubrehang duna diay kini warrant of arrest sa kasong murder nga nahitabo niadtong Oktobre 28 sa milabay’ng tuig.
Samtang ang mga suspek padayun pang gipangita sa kapulisan aron dakpon og pasakaan og kaso.
Samtang laing wanted ang nadakpan tungod sa kasong pagpanglugos didto sa Bayawan City, Negros Oriental human kini gisumbong sa mga polis sa iya kanhi kapuyo diha sa barangay Bangcogon lungsod sa Oslob nga nagselos nga gibiyaan sa suspek. Ang nadakpan sa kapulisan niadtong Biyernes sa alas 4:00 sa hapon mao si Eddie Boy Sevilla alyas Toto, 28, taga Poblacion, Bayawan City, Negros Oriental apan anaa na manimuyo sa barangay Bangcogon, Oslob.
Dali dayong gitawgan sa kapolisan ang Bayawan police ug didto nakompirmar nga duna kini warrant of arrest gikan sa sala ni RTC branch 63 judge sa Bayawan City nga si Judge Orlando Velasco hinungdan nga ilaha kining gidakop. - Darrel Carumba (BANAT NEWS)