CEBU, Philippines - Polis nga gipasanginlang “vigilante” gipasakaan na usab og laing reklamo sa mga mikiha kaniya tungod sa giingong pagpang-harass niini kanila.
Si Reynaldo Sabellano, 31, taga J. Tabora St. sa Pardo, mipasaka og kasong Grave Misconduct batok kang SPO4 Sanrico Jolejole nga nadestino sa Pardo Police Station ngadto sa buhatan sa Regional Internal Affairs Service kun RIAS.
Mipasangil si Sabellano nga nabalaka siya sa iyang seguridad human kanunay’ng makit-an si Jolejole ug mga police assets niini diha sa ilang lugar ug usahay anha gyud mopundo sa ilang tugkaran hinungdan nga mipasaka siya og laing reklamo ngadto sa RIAS.
Ang maong polis gikatahong pabilin pa gihapong nadestino diha sa Pardo police station bisan paman sa kasong gisang-at na sa Commission on Human Rights-7 nga attempted murder.
Ang CHR -7 una nang mipasaka og kasong attempted murder batok kang Jolejole tungod sa pagsulay niini pagpusil patay kang Sabellano kaniadto.
Si CHR-7 Regional Director Alejandro Alonso Jr. nipasaka sa maong kaso ngadto na sa city prosecutors office batok kang SPO4 Jolejole human nga namatud-an sa imbestigasyon ni Atty. Arvin Odron nga sad-an gyud si SPO4 Jolejole sa paggukod ug pagpusil kang Sabellano.
Si director Alonso wala mihatag og gibug-aton sa mga panghimakak sa polis tungod sa dili matuis nga positibong gi-identify sa biktima si Jolejole nga maoy nipusil sa biktima.
Si Sabellano kinuyugan sa iyang amahan ang nipirma og certificate of non-forum shopping pagmatuod nga wala nay lain pang ahensiya sa kagamhanan nga iyang giduol. - Chester Abadilla (BANAT NEWS)