CEBU, Philippines - Ang pangulo sa kapolisan sa dakbayan sa Sugbu Sr. Supt. Patrocinio Comendador miawhag sa mga tinun-an nga magmabinantayon kanunay human sa mga balita nga ang mga banggiitang tulisan gikan sa Mindanao ania na sa Sugbo.
Kini maoy panawagan ni Comendador human ang mga sakop sa Theft and Robbery Section (TRS) milampos sa pagsikop sa duha ka mga notadong mangunguot nga gikan sa Tacloban ,Leyte sa miaging adlaw.
Ang mga suspetsado giila sa kapolisan nga sila si Sonny Aldani 39, Jomar Mendoza, 24, pulos taga San Jose, Tacloban, Leyte, kinsa nasikop niadtong Sabado sa kadlawon diha sa pier 4 ning dakbayan.
Matud pa ni Comendador nga angay gyud magbantay sa ilang kaugalingon ang mga tinun-an karong mga panahuna kay tingbalik na usab nila nganhi sa Sugbu aron magpa-enroll alang sa umaabot nga pagbukas sa klase.
Giklaro ni Comendador nga sila si Aldani ug Mendoza gibantayan nang daan sa iyang mga sakop kay iya kining gitahasan sa pagmonitor sa mga pasahero sa barko nga gikan sa ubang probinsya aron kapugngan ang mga krimen diha sa pantalan sama sa snatching, pagpanguot, pagpangilad ug uban pa.
Gibutyag ni Comendador nga basi sa ilang nakuhang impormasyon ang maong mga suspetsado kini mangabot dinhi sa Sugbu matag adlaw’ng Lunes ug mopauli usab inigka-Biyernes sa ilang lalawigan human makapangigo dinhi sa Sugbu.
Hinuon ang duha mitug-an ngadto sa kapolisan nga ang modus nila mao ang pagpanguot sa mga pasahero sa barko nga mopauli sa Leyte.
Ang mga akusado mitug-an usab sa Banat News nga matag buwan sila moanhi sa Sugbu tungod kay kasagaran adto sila manguot sa Manila.
Miangkon hinuon ang mga akusado nga labing menos makatigom silag P8 mil matag buwan sa ilang kinuotan, depende sa panginabuhi sa tawo nga ilang mabiktima. - Guam P. Logroño (BANAT NEWS)