CEBU, Philippines – Mibahad ang hepe sa kapulisan sa dakbayan sa Sugbu Sr. Supt. Patrocinio Comendador nga ipatangtang sa serbisyo ang mga sakop nga masakpang moprenda sa ilang service firearms.
Kini human makadawat og reports si Comendador nga adunay mga police sa Cebu City Police Office (CCPO) nga namrenda sa ilang mga service firearms sa mga loan shark.
Kasong malversation of public property unya ang atubangon sa maong mga polis kun iyahang mailhan ug iyahang paninguhaong matangtang sila sa serbisyo.
Nunot niining mga report ang CCPO naglaraw nga ipa-stencil gyud ang maong mga armas aron masigurong ang armas nga ipakita kanila atol sa inspeksyon mao gyud ang armas sa gobiyernong giisyu kanila.
Gipadayag niini nga dili siya makatugot nga mga paltik na hinuon maoy dalhon nga service firearm sa polis gumikan kay ang mga original naprenda na ngadto sa mga loan sharks.
Mibahad usab si Comendador ngadto sa mga loan sharks nga nagpahulam og salapi sa mga polis nga wala silay luna diha sa CCPO ug sikupon sila kun masakpan diha sa sulod sa kampo.
Wala usab mahulga si Comendador nga ang pipila sa mga loan sharks gipanag-iya sa iyang mga kaubang opisyal sa kapolisan, matud pa niya katungod sa mga polis nga moduol sa mga tigpautang basta dili lang sulod sa kampo himuon ang transaksyon. - Guam Logroño (BANAT NEWS)