CEBU, Philippines – Patay ang drayber sa nalukot nga motorsiklo human mibangga sa gikasugat nga bus sa Rough Rider sa may pantalan sa Poblacion siyudad sa Danao niadtong Biyernes sa alas 8:30 sa gabii.
Ang namatay mao si Ronnel Manggas Batican, 20, taga barangay Sandayong Sur sakop sa nahisgutang siyudad, samtang ang drayber sa bus nga si Gerald Omolon, mitahan human sa hitabo.
Matud pa ni PO1 Rommel Costan gidudahan nakainom ang biktima ug kusog kaayong nagpadagan sa iyang motorsiklo paingon sa habagatang bahin.
Ang bus nga paingon sa amihanang bahin niadtong higayuna dihang pag-abot sa maong lugar nga kurbadahon aksidenteng mikawat sa pikas nga lane ang motorsiklo hinungdan sa pagsampak niini sa duha.
Matud sa mga nakasaksi nalukot ug maayong pagkaguba sa motorsiklo human mosampak sa tuong bahin sa atubangan sa maong bus ug nalabay pipila ka metros ang biktima.
Daling gidala sa Danao District Hospital si Batican apan gibalhin dayun kini sa Vicente Sotto Memorial Medical Center (VSMMC) apan namatay gyud kini samtang giatiman sa mga doctor. - Darrel Carumba (BANAT NEWS)