CEBU, Philippines – Patay ang usa ka 9-anyos nga batang lalaki human maatrase ug naligsan sa garbage compactor truck samtang nanguykoy og basura sa dumpsite sa barangay Cadulawan lungsod sa Minglanilla niadtong Huwebes sa alas 11:00 sa buntag.
Ang biktima nga namatay pipila ka gutlo human sa paghilandig sa tambalanan mao si John Jason Cinco, 9, tinun-an sa grade-II nga nagpuyo sa maong lugar.
Ang maong garbage truck iya sa kagamhanan sa Minglanilla ug gimaneho ni Roberto Cañedo, 60, taga barangay Pakigne.
Matud pa ni SPO1 Florante Capangpangan sa Minglanilla police dihang nahinabi sa Banat News naglabay og mga basura ang maong garbage truck sa maong lugar ug pagkahuman niini og diskarga niatras kini aron mobalik sa lungsod.
Wala makabantay ang drayber nga daghang mga bata sa luyo nga nagduwa-duwa samtang nagkalingaw pagpamasura.
Nabantayan nalang sa drayber nga dunay batang naligsan dihang misinggit ang mga batang basurero nga dunay naligsan sa luyo hinungdan nga dali siyang mihunong.
Dihang gisusi sa ilawom naghigda na sa yuta ang biktima ug diha nalang niya masayring nalatayan kini sa luyong ligid sa iyang garbage truck diha sa tiil ug kalawasan.
Gidali unta dayon og karga sa drayber ang biktima ug gihatod sa Minglanilla District Hospital apan paglabay sa pipila ka gutlo namatay kini.
Ang drayber boluntaryong mitahan sa kapolisan, nasayran nga nakig-areglo ang drayber inabagan sa lungsod bugti sa pag-abaga sa tanang gastuhan sama sa paghipos sa patay’ng lawas sa biktima.
Sa report sa Balitang Bisdak niadtong Biyernes gibasol sa mga ginikanan ang maong drayber ingon man ang ubang trak nga maglabay sa basura sa ilang pagpakusog og padagan atol nga maglabay og basura diha sa maong dumpsite. – BANAT NEWS