CEBU, Philippines – Giawhag ni Kongresista Benhur Salimbangon sa ika-upat nga distrito sa lalawigan sa Sugbu ang kapolisan sa siyudad sa Bogo nga mopahigayon og imbestigasyon pagtino kun wala bay nahitabong inside job sa pagpanglungkab sa iyang opisina diha sa New Public Market sa Cantecson, Gairan sa milabay’ng adlaw.
Hinuon gisalikway ni Salimbangon ang posibilidad nga dunay bulok politika ang nahitabong insidente tungod kay alang niya normal lang ang mga kawat ug mga pagpanglungkab nga maoy sagad mahitabo sa maong lugar.
Apan matud sa kongresista gusto lang niyang mahibaw-an kun wala bay nagpaluyo nga empleyado sa maong panghitabo hinungdan nga giawhag niya ang kapolisan paghimo og imbestigasyon.
Giklaro hinuon sa kongresista nga wala hinuoy mga importante kaayong dokumento nga nahanaw tungod kay ang mga papeles lang sa mga benepisyaryo sa magpa-miyembro sa iyang health card program ang nakabutang niini ug ang kuwarta nga sobra sa P5 mil nga nahanaw nga koleksyon sa kooperatiba.
Gidugang ni Salimbangon nga sa iyang inisyal nga impormasyon subay sa iyang staff nga nagpahibalo kaniya nga dunay bata nga nakasulod sa luyo nga bahin sa opisina ug maoy gituohang nanguha sa nahanaw nga butang ug kwarta.
Matud ni Salimbangon iya na hinuong gipahimangnoan ang gwardiya nga magbantay gyud og maayo ug dili mokompyansa aron dili masubli ang maong panghitabo.
Samtang si PO3 Allan Dosdos, imbestigador sa Bogo Police station sa dihang nahinabi sa Banat News mibutyag nga subay sa inisyal nilang imbestigasyon didto moagi ang usa ngadto sa duha ka tawo sa luyo nga bahin dapit sa dagat paingon sa sulod sa buhatan.
Giangkon ni PO3 Dosdos nga dunay daghang mga kaso sa pagpanglungkab nga mahitabo sa ilang lugar ug dunay uban niini ilang nasulbad apan dunay uban wala.
Gihulagway niya nga sagad sa mga responsable niini dili lumad nga taga Bogo ug dayo lang sa lugar ug usa sa nakitang hinungdan nila mao ang kalisod sa panahon ug ang pagbisyo sama sa pagamit og gidiling drugas.
Nasuta usab sa kapolisan nga daghang mga batan-on nga rugby boys ang anha mag-estambay sa gawas nga bahin sa opisina sa kongresista panahon sa hapon hangtod sa gabii. - Darrel A. Carumba (BANAT NEWS)