CEBU, Philippines – Nalungag ang agtang sa usa ka mag-uuma human gipusil patay atol sa kapistahan sa bukirang bahin sa sitio Lapa sa barangay Mantalongon lungsod sa Dalaguete niadtong Huwebes sa alas 5:00 sa hapon.
Ang biktima giilang si Veronico Vargas alyas Ekoy, lumad taga Negros Oriental apan anaa na magpuyo sa nahisgutang lugar samtang wala pa mailhi sa kapulisan ang mamumuno niini.
Matud pa ni SPO4 Mansueto Lopez sa Dalaguete Police dihang nahinabi sa Banat News ang amahan ug anak nga si Ellecer Carticiano ug Julito Carticiano, maoy unang nakadiskubre sa patay’ng lawas sa biktima nga naghapla na duol sa ilang balay ug wala nay kinabuhi.
Dali nilang gipahibalo sa kapulisan ang maong patay’ng lawas.
Sumala pa sa kapolisan diha sa naglunang nga dugo sa biktima napalgan ang usa ka plastic cap nga gituohang basiyo sa bala sa shotgun nga maoy gituohang gigamit sa suspek pagpusil sa biktima.
Sa gihimong pakisusi sa municipal health officer nga si Dra. Reynalda Compasibo nasuta nga nalungag ang luyong bahin sa ulo sa biktima nga gipusil sa shotgun ug nilapos sa agtang.
Base sa nakitang samad sa biktima gituohang gidul-itan sa sumbohan sa shotgun ang ulo ni Vargas. - Darrel Carumba (BANAT NEWS)