CEBU, Philippines – Gidudahang tinuyo ang nahitabong sunog kagahapon sa kaadlawon diha sa eskina sa mga dalan F. Llamas ug E. Sabellano sa barangay Punta Princesa ning siyudad sa Sugbu.
Alas 3:23 nadawat sa kabumberohan sa dakbayan ang alarma nga gibana-banang midanyos og P300 mil nga nakontrolar hinuon sulod sa 7 ka minutos.
Ang nasunog mao ang mga panimalay nga gipanag-iya nilang Rolando Avila ug Basilio Nadela diin gikataho nga nagsugod ang kalayo.
Walay nakalas sa maong insidente apan usa ka Lourdes Villarosa, 41, ang naangol ug gituohang napiang sa nahisgutang hitabo human kini moambak gikan sa ilang giabangan nga lawak sa usa ka boarding house nga silingan sa panimalay ni Nadela.
Arson maoy usa sa anggulo nga tan-awon ni Fire Investigator FO3 Antonio Gonzales sa himuon niining imbestigasyon tungod sa mga ebidensyang ilang nahipos.
Usa ka trapong giingong nanimaho og gas nga gituohang maoy gipangsilab sa pagsunog.
Nagkanayon ang fire investigator nga iyang padalhan ug subpoena silang Avila ug Nadela lakip na ang caretaker niini nga si Mamerto Cuyag.
Ipatawag usab ni FO3 Gonzales ang street cleaner nga si Alejandro Sabal nga giingong maoy nakasaksi sa pagdilaab sa kalayo.
Nakadugang sa pagduda sa fire investigator nga tinuyo ang sunog dihang iyang nasayran nga nagkasungi ang managsilingan nga sila si Avila ug Nadela. - Elly Bolonos (BANAT NEWS)