CEBU, Philippines – Mipahibalo ang buhatan sa Government Service Insurance System (GSIS) ngadto sa ilang mga pensioners kansang adlaw’ng natawhan ming-igo sa buwan sa Mayo sa pagkuha sa ilang Annual Renewal of Active Status (ARAS) isip requirement aron makapadayon pagkobra sa ilang pension ug para malikayan ang pagka-suspende niini.
Matud pa sa kadagkuan sa GSIS nga gipasayon ug gipadali na ang proseso sa pagkuha ug pag-avail sa ARAS tungod sa high-tech nga pamaagi niini.
Ang mohikay niini gihangyo paadtuon sa labing duol nga GSIS servicing office nga adunay GSIS Wireless Automated Processing System ug dad-on lamang ang ilang eCard Plus.
Mahimo pud nga i-renew sa mga pensyonado ang ilang active status sa paggamit lamang sa ilang mga cellular phones sa bag-o nga sistema nga gitawag og GSIS Voice Activated Processing System (GVAPS).
Duna kini recorded voice nga mogiya sa mga GSIS pensioners sa pag-renew sa ilang active status.
Kinahanglan lang nga adunay eCard nga iandam ang maong mga pensyonado kung mo-access na siya niining bag-o nga sistema.
Karon lamang bag-o, gipahibalo sa GSIS nga makuha na sa mga pensyonado ang ilang pension kada petsa otso kada buwan nga mas daling proseso kompara sa ilang karaan nga proseso. - Lovers Lyn Yangyang (BANAT NEWS)