CEBU, Philippines – Midangop ang usa ka inahan ngadto ni Provincial Board Member Agnes Magpale human giamong-amongan ang iyang 11-anyos nga anak sa ilang barangay secretary sa usa sa mga bukirang barangay sa lungsod sa Tuburan.
Segun sa taho sa kapolisan nga niadtong Abril 18 midangop ang inahan sa bata tungod kay gikatahong giamong-amongan sa 60-anyos nga barangay secretary (tinuod nga bansagon gipugngan sa Banat News).
Matud ni Magpale kinsa chairman sa committee on Women’s and Children sa Hunta Probinsyal, niadtong Marso 29 sa mga ala-una sa hapon nag-inusarang nangahoy sa ilang lugar.
Apan sa iyang pagpauli giingong giatngan kini sa suspek ug gipugos pagpahigda sa kasagbutan dayon gimanduang pahuboon sa iyang sapot dungan sa paggamit og kusog ug hulga.
Ang bata gumikan sa kahadlok wala na makapanalipod sa iyang kaugalingon hinungdan nga milampos ang suspek sa paglugos kaniya.
Human milampos ang suspek gihulga pa ang biktima nga patyon kun ugaling mosumbong kini sa nahitabo kaniya.
Apan wala mahulga ang bata ug gisumbong niya ang gihimo sa suspek ngadto sa iyang inahan ug niadtong Abril 18 midangop sila ngadto sa Tuburan Police Station aron isumbong ang gidangatan niini.
Ang bata kasamtangan karung gikustodiya sa Department of Social Welfare and Development (DSWD)-7 human mahiling sa pink room diha sa Vicente Sotto Memorial Medical Center.
Matud ni Magpale ang kasong pagpanglugos batok sa secretaryo pormal nang gisang-at sa piskaliya apan hangtud karun pabiling nagtago-tago ang suspek. – BANAT NEWS