CEBU, Philippines – Hingpit nang gibasura sa Commission on Elections (COMELEC) niadtong Marso 9, 2009 ang gidusong reklamo sa kanhi kandidato sa pagka-mayor sa lungsod sa San Fernando nga si Renee Canoy batok kang Mayor Lakambini “Neneth” Reluya sa maong lungsod.
Mireklamo si Canoy sa pagtuo nga ang 40 botos nga labaw ni Reluya kaniya mga pinalit sa mayor.
Apan tungod sa kapakyas ni Canoy sa pagbayad sa P1,000 nga appeal fee ngadto sa hukmanan, gibasura sa Comelec ang maong petisyon.
Base sa desisyon sa Commission Second Division nga kung ang appellant mapakyas sa pagbayad sa appellant fee ngadto sa lower court sulod sa lima ka adlaw ilang ibasura ang reklamo.
Nagtuo ang Comelec nga si Canoy walay kaikag sa pagpadayon sa iyang reklamo batok kang Reluya. - Brenda D. Batuto (BANAT NEWS)