CEBU, Philippines – Namatay ang usa ka drayber sa habal-habal dihang gipusil kini sa usa ka wala hiilhing babaye nga may kuyog usab nga lalaki didto sa parkinganan sa mga habal-habal sa barangay Sacsac sa lungsod sa Consolacion niadtong Martes sa alas 6:00 pasado sa gabii.
Ang biktima mao si Joammy Cantano, 33, ulitawo, apan adunay kapuyo nga babaye nga taga Sacsac.
Si SPO1 Romulo Sasing sa Consolacion Police Station mibutyag sa Banat News nga gikan pa nga naghatod og pasahero sa barangay Poblacion sa maong lungsod ang biktima.
Dihang miparking kini gitirohan dayon sa kriminal ang iyang ulo pinaagi sa usa ka armas de fuego nga wala matino ang kalibre.
Midugang si SPO1 Sasing nga sa dihang nahagba na sa yuta ang biktima, gikuha dayon sa kriminal ang motorsiklo sa biktima ug gidrayban kini sa kauban niyang lalaki dayong pahilayo gikan sa maong dapit.
Sumala sa mga saksi nga ang kriminal nagpaabot sukad pa sa alas 5:00 ang takna sa hapon ug sa pag-abot gyud sa biktima wala maglangay gipusil dayon kini.
Sa pagkahagba sa yuta sa biktima nabugtoan usab dayon kini sa kinabuhi.
Matud pa ni SPO1 Sasing nga padayon pa nilang gipangita karon ang motorsiklo sa biktima nga gidala sa suspetsado. - Romeo T. Limpangog (BANAT NEWS)