CEBU, Philippines – Tulo ang patay sa usa ka pamilyahan nga gisaka ug gitabangan sa pagpanigbas ug dunggab samtang nangaon sa ilang panihapon didto sa Sitio Amyang, barangay Cansuwang siyudad sa Cabancalan, Negros Occidental niadtong Martes sa alas 7 sa gabii.
Ang namatay mao ang mag-uuma nga si Elmer Florendo, 25, ug mga manghod niini nga sila si Crispino Florendo, 15, ug kamanghuran nga si Christine Florendo, 10.
Matud sa hepe sa Cabancalan City Police Station Supt. Calixto Mabugat kalit lang misaka ang gibanabanang tulo ngadto sa upat ka tawo samtang nanihapon ang mga biktima dayong deretso sa pagpanigbas ug dunggab.
Subay sa inisyal nga imbestigasyon ang kamanghuran nga biktima nga si Christine nakahimo pa sa pagdagan paingon sa gawas sa balay bisan ug nakaangkon og daghang samad tinigbasan sa iyang lawas ug nawong ug nakahimo pa pagsinggit pagpangayo og panabang sa ilang mga silingan apan wala madugay nahagba kini ug namatay.
Maayo na lang gani kay wala diha sa balay ang mga ginikanan sa mga biktima sa dihang nahitabo ang maong pagpangatake ug bugtong ang mga biktima lang ang nahabilin.
Matud ni Supt. Mabugat padayon pa ang ilang gihimong imbistigasyon ug kagahapong adlawa mibalik ang iyang mga sakop sa crime scene pagpanghipos og dugang ebidensiya ingon man mga saksi nga makatumbok sa mga suspek ug aron ma-establisar ang motibo sa krimen.
Nasayran nga ang biktima nga si Elmer ug Crispino pulos naputos ang kalawasan niini sa mga samad dinunggaban ug tinigbasan apil na ang ilang nawong. – BANAT NEWS